Gjakovë – Paraburgim ndaj të dyshuarit për vrasjen e tezakut

Gjykata Themelore e Gjakovës e ka aprovuar kërkesën e Prokurorisë Themelore dhe i’a ka caktuar masën e paraburgimit prej një muaji të pandehurit me inicialet D. P., për shkak të dyshimit të bazuar se ka kryer veprën penale të vrasjes së rëndë dhe mbajtjes pa autorizim të armës.

Sipas aktakuzës, i pandehuri më 24 prill 2020, rreth orës 19:00 në fshatin Nec të Gjakovës, me dashje i’a morri jetën familjarit të tij (djalin e tezës), tani të ndjerin D. Gj. me një pushkë gjuetie, pas një fjalosje që kishin pasur.

Më poshtë mund ta lexoni komunikatën e plotë:

Me këto veprime i pandehuri, dyshohet të ketë kryer veprat penale “Vrasja e rëndë” dhe veprën penale “Mbajtja në pronësi, kontroll ose posedim të paautorizuar të armëve”, vepra këto të sanksionuara me Kodin Penal të Republikës së Kosovës (KPRK).

I pandehuri do të mbahet në paraburgim në kohëzgjatje prej një (1) muaj, i cili do të llogaritet nga data 24 prill 2020 dhe do të zgjasë deri më 24 maj 2020.

Gjyqtari i procedurës paraprake në Departamentin e Krimeve të Rënda, Gëzim Pozhegu pas shqyrtimit të shkresave të lëndës, ka konsideruar se janë përmbushur kushtet ligjore për caktimin e masës së paraburgimit ndaj të pandehurit, pasi caktimi i masave tjera alternative do të ishin të pamjaftueshme për zhvillimin me sukses të procedurës penale.

Palët kanë të drejtën e ankesës ndaj këtij vendimi në Gjykatën e Apelit të Kosovës. //KosovoInsights